امتى الانسان

المصرى العربى ... من بنى آدم

هيرجع لانسانيته ؟؟؟

------------------------------------------------------------------------------

عندما تسقط كل الوصايه التى تمارس عليه

سيعود الانسان لحريته الاولى التى خلقه الله عليه

****

عندما يعرف ان

"لا اله الا الله "

سيسقط من ينصبون انفسهم " ارباب من دون الله"

تارة باسم الدين "رجال الدين" .. وتارة باسم الفكر ..وتارة باسم مصلحة الوطن

****

عندما ينتهى التسلط الذى يمارس على المواطن المصرى

سيخطىء وسيصيب .. مثلما يخطىء ويصيب الآن

لكنه سيصبح حينها

حرا

****

وحينها سيظهر الانسان الحقيقى الذى خلقه الله .. والذى نفخ فيه من روحه

****

وحينها سيكون اكثر من كونه كريم العنصرين

****

لكن الحريه تنتزع " فيجب ان نسعى لانتزاعها" ... وعلينا ايضا ان نجعل من حولنا يؤمنون بانهم احرار

زيتلي العجلة لو سمحت

خدت بالي في الاضراب ده من حاجة كدة

هو فعلا الناس العادية مش فاهمة اضراب يعني ايه؟

هما ممكن فاهمين انه مافيش شغل و خلاص

بس انا خدت بالي ان كتير من اللي نزلوا في الشارع نزلوا مع اللمة

و لما لقوا فيه ناس اتجرأت على الشرطة

هما كمان اتجرؤا و بدأت الناس تتحرك

هما صحيح كان عندهم مطالب

بس ممكن مش ده اللي كانوا بفكروا فيه و هما بيواجهوا الحكومة

انا اتولدت في المحلة و عشت فيها فترة

الناس زهقت من السلطة اللي خانقاهم

و مشركاهم في اكل عيشهم بكل اوجه الفساد

الموضوع مكانشي رغيف عيش و غلا بس

الموضوع كان قرف و كره للحياة دي

الناس زهقت من الظلم و الفساد

عارفين او اخيرا عرفوا ان حياتهم المفروض تكون احسن من كده

ان مش المفروض حد يديهم على قفاهم و يردوا بمعلش يا باشا انا الغلطان

بقوا بيقولوا ليه مش انا اللي ابقى الباشا؟

هي البلد دي مش بلدنا زي ما هي بلدهم؟

طب ليه احنا عايشين في قطران و هما كل حاجة متيسرلهم؟

طب الناس بره عدت مرحلة انها تفكر هاتجيب اكل منين ولا هاتشرب منين؟

ولا هاكل اصلا النهاردة انا و عيالي ولا لأ ؟

الناس بره بقت بتفكر هاتقضي الويك اند ازاي؟

هاطلع القمر في رحلة سياحية في يوم من الايام ولا لأ ؟

طب احنا ليه في الذل اللي احنا فيه ده؟

ليه بنبقى مروحين مش عارفين نرفع عينا في عين عيالنا علشان ماعناش نجيبلهم عشا؟

ليه حتى مش لاقين نشرب؟

ولا لاقين على الاقل هوا نضيف؟

امال الناس اللي ماسكينا دول كل يوم واحد يطلعلنا في التلفزيونات ويقولولنا فيه كام دشليار مليون دخلت البلد؟

هيه دخلت بلد تانية ولا ايه؟

هيه مش القناة بتاعتنا برضه ولا ده تلفزيون بلد تانية و احنا مش واخدين بالنا؟

طب و اخرت حياتنا كده ايه؟

هانعيش و اموت زي ما اهالينا عاشوا و ماتوا؟

مافيش تغير؟

هانفضل كده؟؟؟؟؟؟؟؟؟؟؟

هي دي الاسئلة اللي كانت في دماغ الناس اللي في الشارع

لا نازلين علشان الطقم بتاعنا دعا لأضراب ولا حاجة

هما الناس بعد ركنة كام مييت سنة

كانوا عايزين حد يزقهم بس

كانوا صدوا و محتاجين زقة

و كل ما نزق اكتر

العجلة - قصدي الناس -هاتتحرك اسرع

و حتى لو مازقيناش

الحكومة عاملة الواجب و كفاية

بتزق و تزيت و تشحم العجلة

و خلاص

العجلة قربت تدوس عليهم

الاضراب نجح والا لامؤخذة ما أنا جحش

شوفوا بقى بما اننا شعب من العالم السابع وان السبب فى كده اننا عاجزين عن تنظيم اى شئ فى حياتنا وحياتنا كلها تخبيط × تخبيط والناس بتاكل فى بعضها وبتقتل بعضها علشان 10 صاغ فرق فى اجرة الميكروباص وكل اللى بيكسب 5 جنيه خايف عليها لأحسن تنقطع عنه "كانه ما لوش رزق فى السما" وكل اللى يقدر عليه ان يسخر من غيره ويسلم بالكدب اللى بيقراه او بيسمعه من ناس هو نفسه يبصم على انهم كدابين
ما علينا نرجع للاضراب طبعاً كلنا وبلا شك نرفض اى اعمال عنف ضد الممتلكات العامة او الخاصة بالغير لكن كلنا برضه نفسنا نلاقي حاجه نفش غلنا فيها بعد ما عزت علينا ادني مطلبات الحياة الادمية لكن للاسف اللى انا شايفه ويمكن اكون غلطان الناس كلها بتسيب الحمار وتشطر على البردعه وأحمد مات فى البلكونة فى المحلة والناس هاتصدق ان المواطنين هما اللى قتلوه زى ما الاعلام الديوس بتاعنا هايقول.
طيب امتى الناس هاتصدق انها ممكن تطالب بحقها وان اللى بيسرق بيسرق بس علشان انت سيبته يسرقك اقف وقول له لأ. يمكن تكون انت اضعف بس صوتك هايسمع غيرك ويمكن تلاقي حد يقف جنبك يسندك . دي الرساله اللى لازم توصل لكل الناس علشان يبقى من حقهم يشربوا مايه نظيفه على الاقل غير كده يبقى اللى يقولي نجح هاقوله لمؤخذة مانتجحش.
بالمناسبة رجالة المحله مع نفسهم من زمان ما كانوش مستنين الاضراب ده علشان يطالبوا بحقهم.

هو انا ليه حاطة ايدي على الكلاكس على طول؟

على طول، زي سواقين التاكسي، بصراحة انا باخاف من الناس، وانا ماشية ممكن اي لطيف يهزر مع صاحبه ويروح زاقه في وسط الشارع وتصادف انه يرميه قدام عربيتي
ممكن من غير هزار يروح اللي ماشي في الشارع مرة واحدة فجأتن مجنح في وسط الشارع
ممكن مرة واحدة فجأتن واحد يروح جاري من الرصيف ده للرصيف ده
ممكن فجأتن واحد سايق على يميني وللا شمالي يركن عليا وهو مش عارف ان على يمينه او شماله عربية
انا ساكنة جنب الجامعة العيال وهم خارجين من الجامعة بيبقوا قدام العربية زي الدبان اللي واقف على عربية الكبدة ومش عايزين يتحركوا
عشان كده طول ما انا ماشية عمالة ادي كلاكسات على طول....بس دي حاجة بتضايق الناس
الناس بتتعصب عليا وبتبص لي بغضب
بصراحة معاهم حق، انا لما بابقى سايقة وكلاكس عربية تانية في ودني بتعصب واتضايق، فما بال اللي ماشيين في الشارع؟ ممكن واحد يبقى تعبان، مصدع، حد كبير ومش مستحمل الدوشة
وبصراحة انا باستعبط بدليل ان لما كلاكس عربيتي كان بايظ كنت بامشي في الشارع ولو حد رمى عليا بادوس على الفرامل
والعيال اللي زي الدبان على عربية الكبدة كنت باقف شوية واستناهم لحد ما ياخدوا بالهم ان فيه عربية عايزة تعدي
وما كانش وقت كتير بيضيع ولا حاجة يعني
يبقى باضرب كلاكس واضايق الناس ليه؟
انا لازم ابطل العادة دي

بالنوسبة لسبب ان المدونة دي بالذات تبقى مفتوحة للجميع

اولا: لان كلنا بقينا نشتكي من بعض ان الاخلاق بقت وحشة مما يدل على ان كلنا اخلاقنا وحشة وبما انها شكوى عامة فالمدونة لازم تبقى عامة كل واحد يقول فيها الاخلاق اللي مضايقاه
ثانيا: هو انا مين وللا داليا بروح خالتنا يعني عشان نقول للناس يعملوا ايه وما يعملوش ايه احنا مش ابلاوات عشان نمسك العصايا للناس ونوجههم واحنا نفسنا محتاجين توجيه
ثالثا: احنا محتاجين منظورات مختلفة عشان نعرف نواجه نفسنا، انا ممكن اكون باتكلم عن الانسانية والاخلاق وانا نفسي باعمل حاجات كتير ضد الانسانية والاخلاق وانا مش حاسة مش عشان انا البعيدة منافقة بس عشان انا البعيدة مش واخدة بالي
رابعا: احنا محتاجين نفرق ما بين القيم والاخلاق وما بين الذوق، انا بابقى ذوق مع اللي يستاهل الذوق لكن القيم والاخلاق لا تتجزأ وما ينفعش تبقى رد فعل لتصرفات اللي قدامي حتى لو اللي قدامي وضيع ولو رميت على اللي قدامي ح الاقي تبريرات كتيرة لتصرفات لا اخلاقية ولا انسانية
خامسا: لازم كل واحد يعترف بفساده عشان يعالجه والفرصة دي مش ح تبقى متاحة لو اتنين او تلاتة او حتى خمسة بس هم اللي بيتكلموا
لازم كتير يتكلموا وانا باقراهم الاقيني باقول آآآآآآه انا باعمل كده فعلا
سادسا: ايوة اصلاح فسادنا هي الوسيلة الوحيدة لمواجهة فساد الدولة ومش ح نقدر نواجه الفساد ده واحنا فاسدين ولازم نعترف ان كل واحد فينا فيه فساد
سابعا: احنا عندنا فشل في العمل الجماعي، ولازم يتعالج، لازم نرجع تاني نلم على بعض
ما حدش ح ينفعنا غير بعض كفايانا اوتيزم فكري بقى
واخيرا: اسوأ خلق في الدنيا اني افتكر نفسي احسن من الناس، واظن ان ده مفتاح سوء الاخلاق اللي بنعاني منه مع بعض
وعلاجه اننا نسمع بعض
احنا بطلنا نسمع بعض خالص، بقينا نفكر ازاي نرد على بعض مش ازاي نسمع بعض

كابتشن..ممكن تعدي الناس؟

من فضلك لو سمحت..نزل ايدك تحت وانت سايق خليك رايق
اللي ماشي على رجليه ده بني ادم لحم ودم ومشاعر واحاسيس، واذا كانت السواقة بتزهق فالمشي في البرد والحر تحت المطر وفي نقحة الشمس بيزهق اكتر، انت قاعد وفوق راسك سقف وهو واقف وزهقان وتعبان، حتى لو غبي، حتى لو رمى نفسه قدام العربية، حتى لو عدى فجأتن وهو مدور وشه، وللا سرحان، وللا بارد، وللا انسة بتمشي تهز على مهلها عشان تغري اللي سايق حتى لو اللي سايق ده واحدة ست ومش ح تتغري ولا حاجة حتى لو وقف فجأتن برضه في وسط الشارع ولبسك في العربية اللي وراك
ده بني ادم
انسان
والبني ادم له الاولوية اكتر من الحديد والصاج ما ينفعش تيجي صاروخ في شارع زحمة وهو بني ادم وعايز يعدي ويبقى متعشم فيك تعديه فتوهمه انك ح تطيره وتخوفه
طبعا ما حدش بيخبط بني ادم وهو قاصد
لكن كتير بيخوفوا بني ادمين وهم قاصدين، واول ما يشوف واحد ح يعدي يروح جاري بسرعة عشان يلقنه درس يخليه يفكر الف مرة قبل ما يمارس حقه الطبيعي في تعدية الشارع
انت عارف يعني ايه تخوف بيني ادم بعربية ممكن تشيله؟ ده استظراف ده؟
بيمشي وهو حاطط امل انك شايفه واكيد مش ح تدوسه لانك مش عايز تودي نفسك في داهية وممكن يكون ماشي سرحان
حقه: مصرح للي ماشي على رجليه يسرح زي ماهو عايز، بس مش مصرح للي سايق انه يسرح
اريحك من الاخر: اركن عربيتك واقف على الرصيف وحاول تعدي وحس باللي الناس بتحس بيه الناس
وشوف ح تتصرف ازاي لما عربية ورا عربية ورا عربية جايين صاروخ وماحدش فيهم بيرحمك من الوقفة وفوق البيعة لما يحسوا انك عايز تعدي يجروا عشان يخوفوك
المشكلة انك ساعات بيتهيألك ان عربيتك اغلى من البني ادم اللي ماشي خصوصا لو كان بني ادم رخم
طب احب ابلغك ان حق الحياة والامان مكفول لكل انسان، حتى الغبي والرخم والبارد والغتيت
حط نفسك مكان الناس قبل ما تتعامل معاهم

اللي عايز يشارك معانا

يتفضل يكتب الميل بتاعه في التعليق واحنا نبعت له دعوة عشان يكتب معانا
مسموح باختلاف وجهات النظر لابعد الحدود
جزء من مشاكلنا اننا ما بقيناش نقبل بعض زي ما احنا، عايزين نتعلم نقبل كلام بعض ونسمع بعض حتى لو اختلفنا
كنت فكرت اني اقول غير مسموح للي بيكره المصريين انه يدخل معانا بس لقيت ان دي غباوة مني
لان المصري اللي بيكره المصريين هو يا اما بيكره نفسه وزعلان منها وفي الحالة دي هو لازم يعبر عن نفسه وياخد فرصة يصالحها
يا اما شايف نفسه احسن من الكل، وفي الحالة دي يا اما نستفيد منه هو احسن من الكل ازاي
يا اما ياخد باله انه مش احسن من الكل ولا حاجة ونبقى قطعنا نص طريق العلاج
ثم اننا كلنا عيانين وبنتعالج مع بعض
اتفضلوا احنا مستنينكوا