Wednesday, April 9, 2008

زيتلي العجلة لو سمحت

خدت بالي في الاضراب ده من حاجة كدة
هو فعلا الناس العادية مش فاهمة اضراب يعني ايه؟
هما ممكن فاهمين انه مافيش شغل و خلاص
بس انا خدت بالي ان كتير من اللي نزلوا في الشارع نزلوا مع اللمة
و لما لقوا فيه ناس اتجرأت على الشرطة
هما كمان اتجرؤا و بدأت الناس تتحرك
هما صحيح كان عندهم مطالب
بس ممكن مش ده اللي كانوا بفكروا فيه و هما بيواجهوا الحكومة
انا اتولدت في المحلة و عشت فيها فترة
الناس زهقت من السلطة اللي خانقاهم
و مشركاهم في اكل عيشهم بكل اوجه الفساد
الموضوع مكانشي رغيف عيش و غلا بس
الموضوع كان قرف و كره للحياة دي
الناس زهقت من الظلم و الفساد
عارفين او اخيرا عرفوا ان حياتهم المفروض تكون احسن من كده
ان مش المفروض حد يديهم على قفاهم و يردوا بمعلش يا باشا انا الغلطان
بقوا بيقولوا ليه مش انا اللي ابقى الباشا؟
هي البلد دي مش بلدنا زي ما هي بلدهم؟
طب ليه احنا عايشين في قطران و هما كل حاجة متيسرلهم؟
طب الناس بره عدت مرحلة انها تفكر هاتجيب اكل منين ولا هاتشرب منين؟
ولا هاكل اصلا النهاردة انا و عيالي ولا لأ ؟
الناس بره بقت بتفكر هاتقضي الويك اند ازاي؟
هاطلع القمر في رحلة سياحية في يوم من الايام ولا لأ ؟
طب احنا ليه في الذل اللي احنا فيه ده؟
ليه بنبقى مروحين مش عارفين نرفع عينا في عين عيالنا علشان ماعناش نجيبلهم عشا؟
ليه حتى مش لاقين نشرب؟
ولا لاقين على الاقل هوا نضيف؟
امال الناس اللي ماسكينا دول كل يوم واحد يطلعلنا في التلفزيونات ويقولولنا فيه كام دشليار مليون دخلت البلد؟
هيه دخلت بلد تانية ولا ايه؟
هيه مش القناة بتاعتنا برضه ولا ده تلفزيون بلد تانية و احنا مش واخدين بالنا؟
طب و اخرت حياتنا كده ايه؟
هانعيش و اموت زي ما اهالينا عاشوا و ماتوا؟
مافيش تغير؟
هانفضل كده؟؟؟؟؟؟؟؟؟؟؟
هي دي الاسئلة اللي كانت في دماغ الناس اللي في الشارع
لا نازلين علشان الطقم بتاعنا دعا لأضراب ولا حاجة
هما الناس بعد ركنة كام مييت سنة
كانوا عايزين حد يزقهم بس
كانوا صدوا و محتاجين زقة
و كل ما نزق اكتر
العجلة - قصدي الناس -هاتتحرك اسرع
و حتى لو مازقيناش
الحكومة عاملة الواجب و كفاية
بتزق و تزيت و تشحم العجلة
و خلاص
العجلة قربت تدوس عليهم

3 comments:

جبهة التهييس الشعبية said...

طب بما انه في الاي كلام
مش خايف من الفوضى؟
مش ممكن تكون سياسة القطيع؟
مش ممكن يكون الاقبال على الاضراب ده زي احداث التحرش الجنسي كده
زيطة وخلاص؟
انت ايه رأيك؟

دماغ ماك said...

ماهو يا نونو يا حبيبتي
الفوضة شئ متوقع
من شعب عمره ما اتعلم انه يعبر عن اي حاجة جواه
فالما غطى الحلة ينفجر
لازم تتوقعي كل شئ
بس احنا فيه دور علينا
قصدي يعني الناس اللي عاملة نفسها فاهمة
انننا نحاول نظبت اللي حاولينا و نوعيهم
ونخليهم يوعوا اللي حولهم
وبعد ما نعمل اللي علينا قدام ربنا
برضه هايكون هناك فوضى
ممكن بس نحاول نقللها
بس هايكون فيه
و مالناش اللى الدعاء ان ربنا يستر بعد ما نعمل اللي علينا

دعاء said...

ربما جميل إن الامور تحصل متدرجة بالشكل ده لتلافي الرعب من الفوضى ..

يعني الامر أشبه بأن يتم فتح غطا الحله شوية صغيرين بشوية صغيرين فيعمل تفريغ لأنه لو انفجر مرة واحدة هل هنقدر نتحمل الفوضى

ولكن برضه ده ليه أضرار أن الغليان يهدى والناس تفرغ حبة صغيرين وخلاص خلصت وميحصلش أي حاجة

كل الخيارات احلاها مُر