انا كريم العنصرين..وح ارجع زي ما كنت

إن شاء الله يعني. والله الملحوظ ان كلنا بقينا نشتكي من اخلاق المصريين، كان لسة المخرج احمد عاطف بيكلمني في الموضوع ده من كام يوم وبعدين لقيت داليا صاحبتي بتكلمني في الموضوع ده برضه، وتركب التاكسي تلاقيه بيشتكي من اخلاق المصريين، وتمشي في الشارع، وتروح تشتري حاجة، ومنين ما تمشي تلاقي كل واحد بيقول: ايه القرف ده المصريين بقوا اخلاقهم زفت
طب لما انا معترضة وانت معترض وهو معترض وهي معترضة امال مين اللي اخلاقه وحشة؟
الحقيقة انا متعاطفة قوي لابعد الحدود للاسباب الاتية:
1- فوضى المفاهيم
2- فوضى القوانين
3- فوضى التعاملات: يعني ماحدش بقى عارف ايه اللي له وايه اللي عليه
4- صعوبة المعيشة ولو ان ده مش عذر لان اغلب اللي اخلاقهم وحشة حالهم ميسور او مستور
الخلاصة: مافيش نظام، اللي بيقولوا عليه يا عويس بالعنجليزي: شيستم، مافيش "المكنة" اللي بتشغل المجتمع والقانون والدستور زي اي دولة في الدنيا، الانسان في ظل الشيستم بيبقى متحضر وكويس ومحترم، لما بيغيب الشيستم بيبقى متوحش لانه لازم يعيش في الغابة
كان مرة ابراهيم عيسى كتب يقول ان الدولة نجحت في افساد المصريين، ما بقاش النظام هو اللي فاسد بس، بقى الانسان المصري هو اللي فاسد، روح اي مصلحة حكومية ح تلاقي قوانين ولوائح تخلي حياتك مستحيلة بس الموظف ورئيس القسم بيقترح عليك: ممكن تعمل ورقة صورية تثبت فيها كذا كذا (اللي هو كله كدب طبعا) عشان تثبت حقك، وتكون النتيجة ان كل مواطن مصري ماشي وهو متهم بالتزوير، في اي لحظة تدخل السجن، ممكن المواطنين كلهم يدخلوا السجن لو قررت الحكومة انها تطبق القانون
غير انك ما بقتش عارف ايه حقك وايه مش حقك، انت غلطان وللا صح؟
ولما الدنيا بتزيط كده الطبيعي ان يطلع منك اوحش ما فيك، ما انت بيجيلك احساس ان الدنيا كده بلطجة وما بقيناش مهتمين نعرف الحق من الباطل لاننا حتى لو حاولنا مش ح نعرف
بس انا مؤمنة بالمصريين، بجد للاسباب الآتية:
1- شكوى المصريين، جمعاء، من انحدار الاخلاق: مش من الانساني انك تشتكي من نفسك لكن مجرد انك بتشتكي من سوء اخلاق غيرك ده معناه انك جواك كويس وعايز اخلاق، ده معناه اصلا ان فوضى الاخلاق لسة ما وصلتش جواك بدليل اهو انت عارف ان اللي قدامك ما عندوش اخلاق وكمان مش راضي، متضايق
2- في ظل الفوضى الانسان بيخرج اوحش ما فيه، طب بص حواليك كده: لو هو ده اوحش ما في المصريين يبقى بصراحة المصريين كويسين قوي، المفروض في ظل الفوضى الناس بتدبح بعض، مش مجرد بتغلس على بعض وتظلم بعض
ده حتى الناس اللي بتقول على الامريكان طيبين بيقولوا: عاملين زي المصريين بالظبط، طب المصريين معذورين في اللي هم فيه، لكن الامريكان اللي عندهم شيستم ليه يبقوا زي المصريين؟ يعني احنا في اوحش حالاتنا عاملين زي الامريكان اللي عندهم شيستم صارم؟ طب كويس والله
3- والله العظيم المصريين بشكل عام عندهم سرعة تلبية لاي عمل خير، ولما تتكلم معاهم بيسمعوا والله وبيفكروا في الكلام وبيتأثروا جدا
والله العظيم والله العظيم المصريين كويسين قوي بالنسبة لظروفهم والفوضى اللي بتعم البلد
لكن هو احنا ح نفضل نقول مافيش شيستم ونحط ايدنا على خدنا؟
لا...ده مش طبعنا، فكر كده: لما الزلزال ضرب مصر والدولة ما عندهاش شيستم تتصدى له المصريين لوحدهم عملوا خيام وشالوا بعض
لما حصل السيول والدولة ما عندهاش شيستم تنزح المية الناس نزلت الشارع وفي ايد كل واحد جلده وفتحوا البلاليع ونزحوا المية وما استنوش الدولة
عشان نقدر نطالب الدولة بحقوقنا القانونية والدستورية ونحارب فسادها لازم احنا نتخلص من فيروس الفساد اللي اتزرع فينا بالتدريج
احنا نحط لنفسنا شيستم نرجع بيه زي ما كنا: كريم العنصرين
واحدة واحدة...مش عايزين تنظير ولا كلام كبير يعجز الناس ويحسسهم ان مافيش امل
كل واحد فينا ح يكتب اخلاق بتضايقه في اللي حواليه
وبعدين الخطوة الاهم: نواجه نفسنا باخلاقنا الوحشة
انا شخصيا باعتبر نفسي من اشرار القرية، ولازم يبقى عندي الشجاعة اني اواجه نفسي عشان على الاقل يبقى ليا عين اطالب بحقوقي الدستورية والقانونية كمواطنة
ما ينفعش نتصدى للفساد واحنا عينا مكسورة
مبدئيا في خطوات عايزين نتبديها مع بعض:
1- لازم نواجه نفسنا بالكدب اللي بنكدبه، احنا بقينا نكدب كتير، من غير ما نحس بنفسنا
2- لو قبل ما اعمل حاجة احط نفسي مكان اللي قدامي يمكن فيه حاجات كتير مش ح اعملها
3- الحب الحب الحب الحب الحب الحب
انا شخصيا باحب المصريين قوي، ابسط حاجة عشان انا مصرية، وانا مش باكره نفسي يعني
لازم نصالح نفسنا ونصالح بعضنا عشان نرجع تاني زي ما كنا
ابتدينا انا وداليا البلوج ده وفاتحين الباب لكل المشاركات
ح نتكلم عن سلوكياتنا اليومية ونحاول نصلحها مع بعض
فيه سلوكيات ح تبقى معضلة، زي اني لو استذوقت مثلا وانا سايقة مع كل اللي حواليا مش ح امشي في سنتي
زي اني لو ما عملتش الورق "الصوري" اللي بيقترحه الموظف حقي ح يتاكل
زي اني لو ما دفعتش رشوة مش اخلص ورقي
وهكذا
واحدة واحدة، وكل حاجة تتحل واحنا مع بعض، وانا باحبكوا كلكوا كلللللللللللكوا التمانين مليون
التمانين مليون؟
ايه ده؟ لا بصراحة لا
انا مش عارفة احب رجال الاعمال والشرطة، طب ماهم بني ادمين برضه، احاول كده؟
...لا مش قادرة مش قادرة...ما تحملونيش فوق طاقتي
:)
ادي احنا ابتدينا حمرءة