لازم نشيل بعضينا يا حورية

بجد يعني كل واحد بيكره نفسه ليه؟ مرة الدكتور علاء مرسي - ابن محمود مرسي - قلت له هي ليه الناس بقت وحشة؟
فقال لي بصي حواليكي في المكان وعدي لي فيه كام حاجة خضرا في المكان؟
بصيت حواليا وعديت كام حاجة خضرا في المكان
قال لي غمضي عينيكي
غمضت عينيا
سألني: وانت مغمضة قولي لي فيه كام حاجة حمرا في المكان؟
فتحت عنيا وضحكت
فضحك وقال لي انت بتشوفي اللي انت عايزة تشوفيه، لو شوفتي الناس وحشة مش ح تقابلي غير الناس الوحشة
ولو شوفتي الناس كويسة وطيبة ح تشوفي الناس كويسة وطيبة
الحقيقة بالتجربة طلع الكلام صحيح
الغريبة ان الموضوع ده متعلق برأيك في نفسك بس في العقل الباطن
لو شفت في نفسك الحاجات الحلوة ح تشوف الحاجات الحلوة في الناس
لو عقلك الباطن بيقول لك انت وحش ح تحاول بشكل لا شعوري تثبت ان الناس كلها وحشة لان الانسان بطبعه بيحب يرضى عن نفسه
فيه وسائل كتير قوي للواحد عشان يرضى عن نفسه:
زي انك تعمل حاجة مفيدة لغيرك وتشوف السعادة على وشوش الناس واحساسك انك انت السبب في السعادة دي بيخليك مبسوط من نفسك
وعليه فحتلاقي نفسك مبسوط من الناس كمان وح تلاقي ان الناس مش وحشة قوي زي ما الكل بيقول
او زي انك تعمل حاجة انت مؤمن بيها وتحس انك مستعد تموت عشانها، بس الحاجة دي لو مش مرتبطة بمحبتك للناس ح تخليك تحس انك احسن من الباقي، وانا شخصيا مؤمنة ان مافيش حد احسن من حد، فيه حد اوحش من حد: الحد اللي شايف نفسه احسن من الكل
او زي انك مش عارف تعمل ايه او مكسل تعمل ايه او خايف تعمل ايه او تركيبتك النفسية ضعيفة وبتخليك مش قادر تعمل ايه فالاسهل انك تقول ما الناس كلها وحشة، وتدور على الشر اللي في الناس عشان تحس انك احسن منهم
زي ان واحدة تقعد تركز في لبس واحدة تانية وتقول: ايه السفالة دي؟ ايه الانحطاط ده؟
كذا واحدة كلمتني على لبس البنات وقالت لي ان البنات كلهم لبسهم خليع ومحزق الحقيقة كل الناس بتقول لي الملحوظة دي
طب وحياة لا اله الا الله ما شفت ولا واحدة منهم الا اذا كانت ماشية في الشارع بمايوه فطبيعي باخد بالي
لاسباب عديدة: اولا انا مش ح امشي ابص على هانش البنات انا واحدة طبيعية والحمد لله
ثانيا: انا بطبعي مضروبة على دماغي مش باخد بالي من حد ولا باسمع حد لدرجة ان ممكن حد يبقى قاعد جنبي بيقول لي: الحقيني باغرق وانا مش سامعاه
ثالثا: ايه اللي ح احاول اثبته لما اثبت ان كل البنات قلالات الادب؟ اكيد عايزة اثبت اني انا المؤدبة
طب ما بدل ما اثبت اني مؤدبة من خلال قلة ادب غيري
او اني طيبة من خلال شر غيري
طب ما اعمل حاجة تريحني وتخليني احس اني مؤدبة وطيبة
مش قادرة اعمل حاجة، يبقى لما اكفي الناس شري ده في حد ذاته ادب وخير، مش كده؟
طيب يعني ايه؟ يعني لما يبقى فيه حاجة غلط اسكت؟ لا طبعا: افضل الجهاد كلمة حق عند سلطان جائر
واكيد البنات مش هم السلطان الجائر
احنا عندنا خلط شوية في المفاهيم، ما بين: افضل الجهاد كلمة حق عند سلطان جائر والامر بالمعروف والنهي عن المنكر ومابين من حسن اسلام المرء تركه ما لايعنيه
وبما ان الاديان كلها جات عشان "العدل" فانا مسموح ليا اتدخل لما يكون تصرف غيري فيه ظلم لحد اي حد وساعتها ماحدش يقدر يقول لي انت مالك، لا انا مالي ومالي ومش ح اسمح لاي انسان كائن من كان انه يظلم واسكت والا يبقى استنى عقاب ربنا
لكن تصرف ما يظلمش انسان حتى لو كان غلط يبقى انا مالي وباتدخل ليه غير بس عشان اتنطط عليه وافهمه وافهم نفسي والناس اني كويسة على حساب اني اثبت ان غيري وحش؟